पालघर दर्पण: विशेष प्रतिनिधी
पालघर: विक्रमगड तालुक्यातील सुमारे अडीच हजार लोकवस्तीच्या वेहेलपाडा गावासाठी राष्ट्रीय ग्रामीण पेयजल योजनेअंतर्गत सुमारे 75 लाख रुपये खर्च करून पेयजल योजना राबवण्यात आली. मात्र गेल्या दोन वर्षापासून या योजने मधून ग्रामस्थांना एकही थेंब पाणी मिळाले नसल्याने एप्रिल ते जून महिन्यात गावातील नागरिक टँकरद्वारे पाणीपुरवठा वर अवलंबून आहेत. संबंधित ठेकेदाराविरुद्ध कारवाई करण्याची मागणी करण्यात आली असून या गावांमध्ये चार नवीन विंधन विहिरी प्रस्तावित केल्या आहेत.
विक्रमगड पासून सुमारे पाच किलोमीटर अंतरावर असलेल्या वेहेलपाडा पाटीलपाडा नळ पाणीपुरवठा योजना करण्यासाठी सन 2013-14 मधील आर्थिक तरतुदींमधून 73.49 लक्ष रुपये किमतीत योजना प्रस्तावित करण्यात आली. या योजने अंतर्गत नवीन विहीर, पंपगृह, पंपिंग यंत्र सामुग्री, उर्धव वहिनी, उंच साठवणूक टाकी, वितरण वाहिनी, शुद्धीकरण व्यवस्था तसेच महाराष्ट्र विद्युत महामंडळाचे जोडणी करणे अपेक्षित होते. या कामासाठी 2015 मध्ये संबंधित ठेकेदाराला कार्यादेश देण्यात आले व 24 महिन्यात योजना पूर्ण करणे अपेक्षित होते. योजना सन 2018 मध्ये पूर्ण झाली असली तरीही या योजनेतील लाभार्थी असणाऱ्या पाच ते सहा पाड्यातील ग्रामस्थांना पाणी पुरवठा होत नसल्याचे येथील नागरिकांनी तालुका प्रशासनाच्या कडे तक्रारी केल्या आहेत.
विशेष म्हणजे ही योजना कार्यान्वित झाल्याचे कागदोपत्री दिसत असले तरी विक्रमगड तालुक्याचा दरवर्षी तयार करण्यात येणाऱ्या संभाव्य पाणी टंचाई कृती आराखडा मध्ये या योजनेतील काही पाड्यांचा समावेश केला जात आहे. त्यामुळे ७५ लाख रुपये खर्च करून हे गाव पाणी टंचाई भागात येत असून पेयजल योजना प्रत्यक्षात कार्यरत नसल्याचे स्पष्ट होते. त्याचबरोबरीने वेहेलपाडा येथील काचपाडा, आळीव पाडा, कलमपाडा व तळ्याचापाडा या पेयजल योजनेअंतर्गत पाड्यांवर नवीन विंधन विहीर उभारण्यासाठी प्रत्येकी ६८ हजार रुपयांची तरतूद आराखड्यात प्रस्तावित करण्यात आली आहे. या या योजने संदर्भात पाणी पुरवठा विभागामार्फत चौकशी सुरु करण्यात आली आहे.
◾बंद योजनेसाठी दुरुस्ती खर्च
या राष्ट्रीय ग्रामीण पेयजल योजना कार्यान्वित होऊ शकली नसली तरीही या योजनेमध्ये टाकलेले जलवाहिन्या चोरीस गेल्याने व दुरुस्तीचे कारण पुढे करून या योजनेवर दहा लाख रुपयांचा अतिरिक्त खर्च करण्यात आला असे सांगण्यात येत.
◾विक्रमगड तालुक्यातील वेहेलपाडा येथे 75 लक्ष किमतीची राष्ट्रीय ग्रामीण पेयजल योजनेअंतर्गत योजना राबविण्यात आली. असे असताना सन 2020- 21 च्या संभाव्य पाणी टंचाई कृती आराखड्यात वेहेलपाडतील पाच पाड्यांमध्ये पाणी टचाई असल्याचे नमूद करण्यात आले आहे. ही योजना पूर्ण झाली नसली तरी ठेकेदाराला संपूर्ण पैसे अदा करण्यात आले आहेत. या संबंधात संबंधितांविरुद्ध कारवाई होणे आवश्यक आहे.
- परेश रोडगे, युवा प्रहार ग्रुप विक्रमगड
