बजाज हेल्थ केअरचे हस्तांतरित केलेल्या सर्व कारखान्याची तपासणी गरजेची; मोठ्या प्रमाणात साठवून ठेवलेल्या घनकचऱ्यांची चोरटी विल्हेवाट
पालघर दर्पण: विषेश प्रतिनिधी
बोईसर: तारापुर औद्योगिक क्षेत्रातील बजाज हेल्थ केअर कारखानदारांने हस्तांतरित केलेल्या रासायनिक कारखान्यातुन गेल्या अनेक दिवसापासून घातक घनकचरा व रसायनाची बेकायदेशीर पणे वाहतूक केली जात आहे. महाराष्ट्र प्रदुषण नियंत्रण मंडळाने कारवाई केल्यानंतर देखील रसायनाची चोरटी वाहतूक करताना ट्रक मनोर पोलिसांनी ताब्यात घेतला होता. यातच या कारखानदारा कडुन वारंवार घातक रसायनाची चोरटी वाहतूक केल्याचे उघड झाले असताना या प्रदुषणकारी कारखान्यांना मोहरबंद करून फौजदारी कारवाई केली जात नाही.
महाराष्ट्र प्रदूषण नियंत्रण मंडळा कडुन रात्रीच्या वेळी एक अधिकारी कार्यालयात उपस्थित राहणे बंधनकारक असताना देखील कर्मचारी संख्या कमी असल्याचे कारण देत रात्रीच्या वेळी ग्रस्त घातली जात नाही. यामुळे केमिकल माफियांचे फावत असुन रात्रीच्या वेळी घातक घनकचऱ्यांची व रसायनाची चोरटी वाहतूक सुरूच आहे. 20 मे रोजी बोईसर पोलिसांनी पकडलेले बजाज हेल्थ केअर कारखान्याचे दोन ट्रक बनावट कागदपत्रे सादर करून सोडुन देण्यात आले होते. या कागदपत्रा मध्ये प्लाँट नंबर टी-30 व एन- 92 या कारखान्यांचा समावेश होता प्रत्येक्षात घनकचरा एल- 11 मधुन भरण्यात आला होता. महाराष्ट्र प्रदुषण नियंत्रण मंडळाकडून प्लाँट नं. टी- 30 या कारखान्यांची पाहणी करून त्यावर कारवाई करण्यात आली परंतु प्लाँट नं. एन- 92 या कारखान्यांची तपासणी देखील करण्यात आलेली नाही. याचाच फायदा घेत बजाज हेल्थ केअर व्यवस्थापनाने चोरट्या पध्दतीने आता हा घातक घनकचरा व रसायन विल्हेवाट लावण्यासाठी वाहतूक केली जात आहे.
प्रदुषण नियंत्रण मंडळाकडून याअगोदर कारवाई करण्यात आलेल्या बजाज हेल्थ केअरने हस्तांतरित केलेल्या प्लाँट नंबर एल-11, टी- 30 व ई- 62/63 या कारखान्यावर कारवाई करण्यात आली होती. या कारखान्यात अतिशय घातक असा खुप मोठा घनकचरा व रसायनाचा साठा आढळून आला होता. परंतु हे कारखाने मोहरबंद केले नसल्याने या कारखाना व्यवस्थापनाने प्लाँट नं. टी-30 या कारखान्यातुन 16 जुन रोजी घातक रसायन वाहतूक करणाऱ्या ट्रक वर मनोर पोलिसांनी कारवाई केली होती. प्लाँट नं- एन 92 या अगोदरच्या न्युट्रा प्लस कारखान्यातुन 24 जुन रोजी MH 04 EY 6766 वाहनातुन घातक रसायन वाहतूक केल्याचे छायाचित्र समोर आले आहे. यामुळे बजाज हेल्थ केअरच्या नावी असलेल्या हस्तांतरित केलेल्या सर्व कारखान्यांची तपासणी करण्याची मागणी करण्यात आली आहे.
