◾️गृह राज्यमंत्री सतेज पाटील यांनी लक्षवेधी प्रश्नाला उत्तर देताना विधानपरिषदेत दिली माहिती
पालघर दर्पण : विशेष प्रतिनिधी
पालघर: महिना उलटून जात असताना देखील बोईसर येथील वैद्यकीय शाखेच्या विद्यार्थीनीचा शोध लागलेला नाही. याबाबत विधानपरिषदेत लक्षवेधीला उत्तर देताना गृहराज्यमंत्री सतेज पाटील यांनी या मुलीचा लवकरात लवकर शोध लागावा यासाठी तपास मुंबई गुन्हे शाखेकडे देणार असल्याचे विधानपरिषदेत सांगितले.
विधानपरिषद सदस्य डॉ.मनिषा कायंदे यांनी बोईसर येथील एमबीबीएसची विद्यार्थिनी सदिच्छा साने ही परिक्षेसाठी घराबाहेर पडलेली असताना वांद्रे बॅण्ड स्टँडवरुन दिवसाढवळ्या गायब झाल्याचे 29 नोव्हेंबर, 2021 मध्ये उघडकीस आल्याचे सांगितले. या घटनेला 15 दिवस उलटूनही अद्याप तरुणीचा शोध लागलेला नाही याबाबतची लक्षवेधी उपस्थित केली होती. या लक्षवेधी सूचनेच्या चर्चेत सदस्य गोपिचंद पडळकर, रमेशदादा पाटील यांनीही सहभाग घेतला होता.
बोईसर येथील वैद्यकीय शाखेच्या विद्यार्थ्यीनीचा शोध घेण्यासाठी गृह विभागाचे सर्व प्रकारे प्रयत्न सुरू आहे. हा तपास मुंबई गुन्हे शाखेकडे दयावा अशी मागणी लक्षात घेता तपास मुंबई गुन्हे शाखेकडे वर्ग करण्यात येईल. राज्यात हरवलेल्या मुली अथवा मुलांसाठी मुस्कान हे ऑपरेशन राबविण्यात येते. आतापर्यंत गृह विभागाने अनेक हरवलेल्या मुला-मुलींना त्यांचे स्वत:चे घर पुन्हा मिळवून दिले आहे. शासन महिलांच्या प्रश्नाबाबत सजग असून महाविद्यालय स्तरावरही महिलांमध्ये जनजागृतीपर उपक्रम राबविण्यात येत आहेत. राज्यात सुरक्षिततेच्या दृष्टीकोनातून सीसीटीव्ही कॅमेरेही वाढविण्यात येत आहेत. सायबर गुन्ह्यांना आळा बसावा यासाठी फेसबुक तसेच इन्स्टाग्राम यासारख्या समाजमाध्यमांच्या संदर्भातही सुरक्षिततेच्या दृष्टीने लवकरच उपाययोजना करण्यात येतील. यवतमाळ येथील वैद्यकीय महाविद्यालयातील विद्यार्थ्याच्या पालकांना द्यावयाच्या मदतीबाबतही आरोग्य मंत्री यांच्याशी चर्चा करून त्याबाबत निर्णय घेण्यात येणार असल्याचे गृह राज्यमंत्री सतेज पाटील यांनी या चर्चेच्या अनुषंगाने उपस्थित उपप्रश्नांना उत्तरे देताना सांगितले.
