◾ कमला लाईफ साईन्सेस कारखान्यातील रेमडेसिविर चोरणाऱ्या तिघांवर नाशिक पोलिसांची कारवाई नंतर प्रकार उघडकीस; समाजमाध्यमातून मात्र देशाला रेमडेसिविर पुरवठा करणाऱ्या कारखान्यांची बदनामी करण्याचा प्रयत्न
पालघर दर्पण: विशेष प्रतिनिधी
बोईसर: करोनामध्ये अतिशय महत्त्वाच्या ठरलेल्या रेमडेसिविर औषधांची कारखान्यातुन चोरी केल्याचा धक्कादायक प्रकार समोर आला आहे. तारापूर मधील रेमडेसिविर उत्पादन घेणाऱ्या कारखान्यातुन कामगारांनीच हा चोरीचा प्रकार केला असून नाशिक पोलिसांनी केलेल्या कारवाई मध्ये हे उघड झाले आहे. रेमडेसिविर ची काळाबाजारी करताना नाशिक मध्ये पोलिसांनी काहींना ताब्यात घेतले होते. मात्र आता समाजमाध्यमांवर कारखान्यांचे नाव बदनाम करण्याचा जोरदार प्रयत्न केला जात असल्याने याबाबत सविस्तर पत्रक कारखान्याकडून प्रसिद्ध करण्यात आले आहे.
नाशिक पंचवटी भागात रेमडेसिविर चढ्या दराने विक्री करत असल्याच्या आरोपाखाली तीन तरुणी व एका तरुणाला ताब्यात घेण्यात आले होते. त्यावेळी दोन इंजेक्शन जप्त केले होते. नाशिक आडगाव पोलिस ठाण्यात अन्न व औषध प्रशासनाने गुन्हा दाखल केल्यानंतर बुधवारी 19 मे रोजी आडगाव पोलिसांनी यातील मुख्य आरोपी सिद्धेश पाटील याला पालघर तालुक्यातील उमरोळी येथील राहत्या घरातून अटक करण्यात आली होती. यावेळी त्यांच्या घरातून 63 व्हायल्स जप्त केले असून त्यातील 62 व्हायल्स वरती कंपनीचे कोणत्याही प्रकारचे कंपनीचे लेबल नसल्याचे समोर आले होते. सिद्धेश पाटील यांने रेमडेसिविर हे कमला लाईफ साईन्सेस या काम करत असलेल्या कारखान्यातुन चोरले असल्याचे पोलिस तपासणी मध्ये समोर आले. त्यानंतर मात्र समाजमाध्यमांवर जोरदार रेमडेसिविर चर्चा सुरू होऊन कारखान्यांच्या काही लोक यामध्ये सहभागी असल्याचे संदेश फिरू लागले होते. यातच कारखाना मालका विषयी देखील उलटसुलट चर्चा समाजमाध्यमांवर केली जात होती. मात्र या सर्व चर्चेला कंपनी व्यवस्थापकांनी पुर्णविराम लावला असून याबाबतचे प्रसिद्ध पत्रक कारखान्याकडून जाहीर करण्यात आले आहे.
करोना रुग्णांना अतिशय महत्त्वाच्या असलेल्या रेमडेसिविर इंजेक्शन चा तुटवडा राज्यासह देशभरात भासला होता. सुरूवातीला औषध विक्रेत्यांनी चढ्या भावाने याची विक्री देखील केली होती. तारापूर मधील कमला लाईफ सायन्सेस या औषध निर्मिती कारखान्यांत रेमडेसिविर उत्पादन सुरू झाल्यानंतर राज्या बरोबरच देशातील रेमडेसिविर चा तुटवडा हळूहळू कमी झाला. दिवसरात्र याठिकाणी कामगार काम करून अधिक उत्पादन घेण्याचे प्रयत्न करत होते. मात्र यातीलच एक दोन कामगारांनी अतिशय हुशारीने काही रेमडेसिविर ची चोरी करून त्याची बेकायदेशीर पणे विक्री केल्याचा प्रकार नाशिक पोलिसांनी उघडकीस आणल्यानंतर पालघर मध्ये या औषध निर्मिती करणाऱ्या कारखान्यांची बदनामी सुरू करण्यात आली. महत्त्वाचे म्हणजे अशाप्रकारे चोरी केल्या प्रकरणी दोषींना कठोर कारवाई व्हावी अशी मागणी अनेक स्थरावरून केली जात आहे. कारखान्याकडून पोलिसांना सर्व कागदपत्रे सह तपास कामात संपूर्ण सहकार्य करणार असल्याचे कारखान्या व्यवस्थापना कडून सांगण्यात आले आहे.
