पोलिसांनी कार्यकर्त्यांना घेतले ताब्यात
पालघर दर्पण, वार्ताहर
नालासोपारा : वसईतील वसंतनगरी मध्ये मंगळवारी महानगर पालिकेच्या परिवहन सेवेचे लोकार्पण सोहळा संपन्न झाला. शिवसेनेचे नेते नगरविकास मंत्री एकनाथ शिंदे यांच्या हस्ते हा सोहळा पार पाडण्यात आला. कार्यक्रम सुरू असतानाच मनसेच्या कार्यकर्त्यांनी या कार्यक्रमात राडा सुरू केला. कार्यक्रमात उपस्थित पोलिसांनी मनसे दोन कार्यकर्त्यांना चोप देत १७ कार्यकर्त्यांना ताब्यात घेतले आहे.
महानगर पालिकेच्या परिवहन सेवेच्या उदघाटन कार्यक्रमात नगरविकास मंत्री एकनाथ शिंदे यांना आमंत्रित केले होते. वसईतील वसंतनगरी मैदानात हा कार्यक्रम सुरू होता. कार्यक्रम सुरू असतानाच मनसेच्या दोन कार्यकर्त्यांनी मोठं मोठ्याने मनपा आयुक्त गंगाथरन डी. यांच्या विरोधात घोषणाबाजी करत कार्यक्रमात राडा सुरू केला. “आयुक्त साहेब वेळ द्या” अशी घोषणाबाजी मनसे कार्यकर्ते करत होते. पोलिसांनी त्या दोन कार्यकर्त्यांना चोप देत आणखी १७ कार्यकर्त्यांना ताब्यात घेतली आहे. या सर्व प्रकारामुळे कार्यक्रमात एकाच गोंधळ उडाला.
