◾ वनविभागाच्या संगनमताने ठेकेदारांने तोडलेली वृक्ष केली लंपास; तोडलेल्या वृक्षांचा पंचनामा न करताच हजारो टन लाकुड गायब
पालघर दर्पण: विशेष प्रतिनिधी
बोईसर: रस्ता रुंदीकरणाच्या नावाखाली बेसुमार वृक्ष तोडून लाकूड लंपास करण्याचा प्रकार बोईसर मध्ये घडला आहे. येथील बोईसर-तारापूर रस्त्यांच्या रूंदीकरणासाठी वनविभागाने वृक्ष तोडण्याची परवानगी दिली होती. मात्र मुख्य रस्त्याच्या रुंदीकरणात आड न येणाऱ्या वृक्षांची देखील कत्तल करण्यात आली आहे. विशेष म्हणजे ही वृक्ष तोडताना व तोडल्यानंतर वनविभागाने याचा पंचनामा देखील केला नसुन तोडण्यात आलेली वृक्ष परस्पर ठेकेदारांने लंपास केल्याचा धक्कादायक प्रकार समोर आला आहे.
बोईसर- तारापूर मुख्य रस्त्यांचे रुंदीकरणाचे काम राष्ट्रीय रस्ते विकास प्रकल्पाअंतर्गत सुरू करण्यात आले आहे. याठिकाणी काही भागात रस्त्यांचे रुंदीकरणात आडवी येणाऱ्या झाडांना तोडण्यासाठी वनविभागाने परवानगी दिली होती. मात्र ठेकेदारांने बेसुमार पणे वृक्षतोड सुरू केली असून रस्त्यांच्या मध्ये अडथळा नसलेल्या झाडांची कत्तल देखील करण्यात आली आहे. चित्रालय भागात दुसऱ्या बाजूने रस्ता रुंदीकरण करण्यासाठी जागा असताना देखील 70 ते 80 वर्षे जुने असलेल्या वटवृक्षांवर घाव घालण्यात आला. यातच पास्थळ येथील देखील याठिकाणी असलेल्या मोठ्या वृक्षांचा रस्त्यामध्ये अडथळा नसताना देखील वृक्षतोड केल्याने वृक्ष प्रेमींन कडून संताप व्यक्त केला जात आहे. यातच परवानगी च्या नावाखाली बेसुमार वृक्ष तोड करणाऱ्या ठेकेरावर वनविभागाच्या अधिकाऱ्यांनी देखील दुर्लक्ष केल्याचे दिसून येते. यामुळे वनविभागाच्या अधिकाऱ्यांन सोबत संगनमत करून ही बेसुमार वृक्ष तोड केल्याचा आरोप वृक्ष प्रेमींन कडून केला जात आहे.
रस्त्यांच्या बांधकामात अडथळा निर्माण करणाऱ्या वृक्षांची तोड करण्यासाठी वनविभागाने परवानगी दिली होती. यानुसार रस्त्यांचे सिमांकन करून मध्ये येणारी वृक्षांची संख्या व कोणते वृक्ष कापायचे हे ठरवणे गरजेचे असताना वनविभागाने याकडे दुर्लक्ष केल्याचे दिसून येते. यातच कापलेल्या वृक्षांचे पंचनामा करून त्यावर वनविभागाची मोहर लावून ती लाकडे वनविभाग आपल्या ताब्यात घेते. मात्र हे सर्व नियम धुडकावून कापलेली हजारो टन वृक्षांची लागडे परस्पर ठेकेदारांने गायब केल्याचा प्रकार समोर आला आहे. याबाबत दोन दिवसापासून वनविभागाच्या अधिकाऱ्यांंन कडून माहिती जाणून घेण्याचा प्रयत्न केला असता त्यांना याबाबत अधिकृतपणे प्रतिक्रिया देता आली नाही. यामुळे वृक्षांची बेकायदेशीर पणे वाहतूक करून लंपास केलेल्या लाकडात वनविभागाची भुमिका संशयास्पद असल्याचे दिसून आले आहे. यामुळे या वृक्षतोड प्रकरणाची चौकशी करून आवश्यकता नसताना देखील ठेकेराला फायदा होईल अशा प्रकारे वृक्षतोड सुरू असताना त्याकडे दुर्लक्ष करणाऱ्या अधिकाऱ्यांनवर कारवाई करण्याची मागणी वृक्षप्रेमींन कडून केली जात आहे.
◾ बोईसर तारापूर मुख्य रस्त्यावर तोडण्यात आलेल्या वृक्षांच्या बदल्यात त्याठिकाणी झाडे लावण्याचे बंधनकारक असताना देखील त्याकडे दुर्लक्ष ठेकेराने केल्याचे दिसून येते. याबाबत वनविभागाच्या अधिकाऱ्यांनी ठेकेदाराने त्याठिकाणी वृक्षारोपण केल्याचा दावा केला जात असला तरी याठिकाणी नवीन लावण्यात आलेली वृक्ष कुठेही दिसून येत नाहीत.
◾ रस्त्यांचे रुंदीकरणात आड येणारी वृक्ष कापण्यात आली असली तरी याभागात रस्त्याच्या कडेला असलेली अतिक्रमणे काढण्यात आलेली नाही. याभागातील एका बाजूला असलेली अतिक्रमणे काढली असती तरी शेकडो वृक्षांची कत्तल वाचवता आली असती.
◾वनविभागा कडे तोडलेल्या वृक्षांची लाकडे ठेवण्यासाठी जागा उपलब्ध नसल्याने बोईसर तारापूर रस्त्यावरील तोडलेली वृक्ष ठेकेराने आपल्या कडे ठेवली आहेत. ही लाकडे ताब्यात घेवून सार्वजनिक बांधकाम विभागा मार्फत त्याला लिलाव केला जाईल.
— निलेश मोरे, वनपरिक्षेत्र अधिकारी, वनविभाग डहाणू
