नववर्षारंभाच्या नावाखाली होणारे अपप्रकार रोखण्यासाठी हिंदू जनजागृती समितीने दिले बोईसर व पालघर पोलिसांना निवेदन
पालघर दर्पण: विशेष प्रतिनिधी
पालघर: नववर्षारंभाच्या नावाखाली ३१ डिसेंबरच्या रात्री केेल्या जाणाऱ्या धांगडधिंग्याला हिंदू जनजागृती समितीचा विरोध करत त्यासाठी बोईसर व पालघर पोलिसांना निवेदन देण्यात आले आहे. नववर्षाचे स्वागत करताना मोठ्या प्रमाणात धूम्रपान, मद्यपान, अमली पदार्थांचे सेवन केले जात असल्याने अशा बाबींवर प्रतिबंध करण्याचा आदेश काढावा अशी मागणी हिंदू जनजागृती समिती कडून पोलीस विभागाला करण्यात आली आहे.
हिंदू जनजागृती समितीने दिलेल्या निवेदनात पार्टी मध्ये रात्री मद्यपान करून भरधाव वाहने चालवल्याने अपघातही होत आहेत. गंभीर बाब म्हणजे या रात्रीपासून मद्य पिण्यास आरंभ करणार्या युवापिढीचे प्रमाण लक्षणीय असून यामध्ये अल्पवयीन मुले आणि महिला यांचाही समावेश आहे. रात्रभर मोठ्या आवाजाचे फटाके उडवून प्रदूषण करणे, तसेच कर्णकर्कश ध्वनीवर्धक लावणे, बीभत्स गाण्यांच्या तालावर अश्लील अंगविक्षेप करून नाचणे, शिवीगाळ करणे, मुलींची छेडछाड-विनयभंग-बलात्कार आदी कुकृृत्ये करून एकूणच कायदा अन् सुव्यवस्था यांच्या दृष्टीने गंभीर स्थिती निर्माण होत आहे. त्याचा अतिरिक्त ताण पोलीस आणि प्रशासन यांवर येतो. यासाठी ३१ डिसेंबरच्या दिवशी पालघर जिल्ह्यातील किल्ले, पर्यटनस्थळे, ऐतिहासिक आणि सार्वजनिक ठिकाणी मद्यपान करणे, धूम्रपान करणे आणि पार्ट्या करणे यांस प्रतिबंध करण्याचा आदेश काढावा तसेच या ठिकाणी पोलिस दलाचे नियोजन करण्याची मागणी करणारी निवेदने हिंदू जनजागृती समितीच्या वतीने पालघर जिल्हाधिकारी आणि तहसीलदार कार्यालय, पालघर जिल्हा पोलिस अधिक्षक कार्यालय आणि बोईसर पोलिस ठाणे येथे देण्यात आली.
यंदाच्या वर्षी कोरोना महामारीने सर्वत्र कहर केला आहे. अनेक तज्ञ कोरोनाची दुसरी लाट येण्याची शक्यता वर्तवत आहे. अशा वेळी ३१ डिसेंबरला पार्ट्यांच्या माध्यमातून कोरोनाचा संसर्ग पसरण्याची शक्यताही अधिक आहे. या काळात सार्वजनिक आरोग्य धोक्यात घालणे परवडणारे नाही. त्यामुळे ३१ डिसेंबर आणि १ जानेवारी किंवा ख्रिस्ती नववर्षाच्या निमित्ताने होणार्या सर्व प्रकारच्या सार्वजनिक साजरीकरणावर बंदी घालावी, अशी मागणीही या निवेदनात करण्यात आली आहे.
नववर्ष ३१ डिसेंबरच्या मध्यरात्री नव्हे; तर गुढीपाडव्याला साजरे करण्याचे ऑनलाईन व्याख्याने आणि धर्मशिक्षणवर्गांतून हिंदूंना आवाहन
हिंदू बांधवांनी ३१ डिसेंबरच्या मध्यरात्री नव्हे; हिंदु संस्कृतीनुसार नववर्ष हे चैत्र शुद्ध प्रतिपदेला म्हणजेच गुढीपाडव्याला साजरे करावे ! असे आवाहन हिंदु जनजागृती समितीच्या वतीने या आठवड्यात घेण्यात आलेली व्याख्याने आणि साप्ताहिक धर्मशिक्षणवर्गांतून करण्यात आले. या ऑनलाईत कार्यक्रमांतून पालघर जिल्ह्यातील शेकडो लोकांमध्ये जागृती करण्यात आली. १ जानेवारी खरेतर ख्रिस्ती नववर्षाचा आरंभ आहे. आजमितीला जगभरात ख्रिस्ती राष्ट्रे बहुसंख्य असल्याने आणि या राष्ट्रांनी जगातील बहुसंख्य देशांवर आपले अधिपत्य गाजवल्याने तेथील संस्कृतीचा पगडा जगभर पहायला मिळतो. त्यामुळे ‘१ जानेवारी हे जागतिक नववर्ष आहे’, असा अपसमज निर्माण झाला आहे; भारतीय संस्कृतीनुसार चैत्र शुद्ध प्रतिपदा म्हणजेच गुढीपाडव्याला नववर्षारंभ साजरा करणे हे नैसर्गिक, ऐतिहासिक, आध्यात्मिक या सर्वच दृष्टीने श्रेयस्कर आणि फायदेशीर आहे.
