स्ट्रॉबेरी शेतीची सुरूवात पालघर जिल्ह्यातील जव्हार भागात करण्यात आली
पालघर दर्पण: विशेष प्रतिनिधी
पालघर: मिनी महाबळेश्वर अशी ओळख असलेल्या जव्हारच नाव ऐकलं की समोर येत ते येथील आदिवासीबहुल भागातील कुपोषण, बेरोजगारी आणि निरक्षरता मात्र आता मिनी महाबळेश्वर हे नाव सत्यात उतरवण्यासाठी जव्हार मोखाड्यातील शेतकरी पुढे सरसावले आहेत. पारंपरिक भात शेती आणि नाचणी शेतीला बगल देत येथील शेतकऱ्यांकडून सध्या स्ट्रॉबेरीची लागवड करण्यात आली आहे. यातून येथील शेतकऱ्यांना उत्तम उत्पन्नही मिळत असून जव्हार ची वेगळी ओळख निर्माण होत आहे.
अतिशय दुर्गम भागात असलेल्या जव्हार मध्ये कृषी विभागाच्या सहाय्याने सध्या शेतकरी स्ट्रॉबेरी लागवडीकडे वळताना दिसून येत आहेत. या भागात पावसाळ्यात भात शेती आणि नाचणी ची शेती केली जाते. मात्र या शेतीनंतर येथील अनेक नागरिक हे रोजगारासाठी आपल्या कुटुंबासह स्थलांतरित होतात. स्थानिक पातळीवर रोजगार उपलब्ध नसल्याने स्थलांतरन मोठ्या प्रमाणात होत असल्याने या भागात वर्षानुवर्ष कुपोषण, बेरोजगारी असे प्रश्न भेडसावत आहेत. मात्र यालाच बगल देत आता येथील शेतकऱ्यांनी स्ट्रॉबेरी लागवडीचा यशस्वी प्रयोग केला आहे.
प्रायोगिक तत्त्वावर जवळपास जव्हार आणि मोखाडा येथील 86 शेतकऱ्यांनी 11 एकर मध्ये स्ट्रॉबेरी लागवड केली असून यातून त्यांना बऱ्यापैकी नफा मिळत आहे. शिवाय या स्ट्रॉबेरी वर कुठलाही रोग अजून पर्यंत निदर्शनास आला नसल्याने पुढील वर्षापासून या प्रायोगिक तत्वावर करण्यात आलेला लागवडीचे रूपांतरण व्यवसायिक शेतीमध्ये करण्याचा मानस कृषी विभागाकडून करण्यात आलाय. कृषी विभागाकडून या वर्षी प्रत्येकी शेतकऱ्याला प्रायोगिक तत्वावर सहाशे स्ट्रॉबेरीच्या रोपांच वाटप करण्यात आलं होतं. या लागवडी आधी या शेतकऱ्यांना स्ट्रॉबेरी लागवडीचे प्रात्यक्षिक प्रशिक्षणही देण्यात आले होते.
