दुभाजका मधील धोकादायक अपघात ग्रस्त ट्रक हटविण्यात दिरंगाई

◾महामार्गाचे सुरक्षा अधिकारी आणि पेट्रोलिंग कर्मचाऱ्यांचे दुर्लक्ष वाहनचालकांच्या मुळावर

पालघर दर्पण: वार्ताहर

मनोर: मुंबई अहमदाबाद महामार्गावरील दुर्वेस ग्रामपंचायत हद्दीत साये गावाजवळच्या वळणात सोमवारी (ता.14) पहाटे पाच वाजताच्या सुमारास सिपोरेक्स ब्लॉकची वाहतूक करणारा ट्रकचा अपघात झाला होता. भरधाव वेगातील ट्रकचा पुढचा टायर फुटल्याने अपघात होऊन ट्रक दुभाजका मध्ये कलंडुन पडला आहे. सुदैवाने या अपघातात कोणीही जखमी झाले नाही. परंतु अपघात ग्रस्त ट्रक धोकादायक स्थितीत दुभाजकामध्ये पहाटे पासून पडलेला असूनही सायंकाळ पर्यंत महामार्गाचे सुरक्षा अधिकारी आणि पेट्रोलिंग कर्मचाऱ्यांकडून हटविण्यात आलेला नाही. त्यामुळे महामार्गाच्या सुरक्षा अधिकाऱ्यांकडून होत असलेल्या हलगर्जीपणा बाबत स्थानिक ग्रामस्थ आणि वाहनचालकांनी संताप व्यक्त केला आहे. तसेच अपघात ग्रस्त ट्रक हटविण्याची मागणी केली जात आहे.