◾ भरदिवसा होणाऱ्या वायू प्रदूषणाकडे महाराष्ट्र प्रदूषण नियंत्रण मंडळाचे दुर्लक्ष; विराजच्या वायू प्रदूषणामुळे परिसरातील नागरिक हैराण
पालघर दर्पण: हेमेंद्र पाटील
बोईसर: तारापूर औद्योगिक क्षेत्रातील रासायनिक कारखान्यातून सोडल्या जाणाऱ्या विषारी वायूमुळे औद्योगिक क्षेत्रात आणि परिसरातील गावांमध्ये वायुप्रदूषणाचा स्तर वाढला आहे. राष्ट्रीय हरित लवादाची कारखान्यांवर कारवाईची टांगती तलवार असताना देखील याचे कोणतेही भय प्रदूषणकारी कारखान्यांना उरलेले नाही. परिणामी तारापूर मध्ये नागरिकांचे आरोग्य धोक्यात आले असून वायूप्रदूषणाचा सामाना रोजच करावा लागत आहे. मात्र भरदिवसा सुरू असलेल्या वायू प्रदूषणाकडे महाराष्ट्र प्रदूषण नियंत्रण मंडळ दुर्लक्ष करत असल्याचे दिसून येते.
बोईसर परिसरात दिवस असो किंवा रात्र शुध्द हवा कधीच मिळत नाही. कधी रस्त्यावर उडणारी धुळ तर रात्रीच्या वेळी हवेत पसरलेला रासायनिक वायू याचा त्रास नागरिकांना करावा लागतो. मात्र आता भरदिवसा देखील वायू प्रदूषण पाहायला मिळत आहे. येथील विराज प्रोफाईल या स्ट्रील उद्योग कारखान्यातुन रोज मोठ्या प्रमाणात लालसर असलेला धुर सोडला जात असल्याने सभोवताली परिसरात मोठ्या प्रमाणात वायू प्रदूषण होत आहे. लोखंडावर प्रक्रिया करताना हा निघणारा रासायनिक व धुळीकण असलेला वायू संपूर्ण परिसरात पसरला जातो. रस्त्यावर येणाऱ्या जाणाऱ्या नागरिकांना देखील याचा त्रास होत असताना देखील त्याकडे महाराष्ट्र प्रदूषण नियंत्रण मंडळ दुर्लक्ष करत असल्याचा आरोप नागरिकांन कडून वारंवार केला जात आहे.
कारखान्यातून निघणाऱ्या धुरामुळे वायुप्रदूषण होऊ नये यासाठी स्क्रबर सिस्टमचा वापर करणे आवश्यक असते. परंतु ही प्रक्रिया खर्चीक असल्याने कारखान्यांकडून तिचा वापर केला जात नाही. यामुळे तारापूर औद्योगिक परिसरातील बोईसर, सरावली, कोलवडे, कुंभवली, पाम, पास्थळ व सालवड या गावांतील रहिवाशांना रात्रीच्या वेळी होणाऱ्या वायुप्रदूषणाचा त्रास सहन करावा लागतो. त्यामुळे येथील रहिवार आरोग्यांच्या अनेक समस्या भेडसावत आहेत. नियमांचे उल्लंघन करून रासायनिक वायूचे उत्सर्जन करणाऱ्या कारखान्यांवर कारवाई करण्याची मागणी जोरधरू लागली आहे. विराज प्रोफाइल कारखान्याला याअगोदर देखील अनेकदा नोटीसा महाराष्ट्र प्रदूषण नियंत्रण मंडळाने बजावल्या असून कारखान्यात स्क्रबर सिस्टम उभारण्यासाठी मुभा देण्यात आली आहे. मात्र कारखानदाराकडून प्रदूषणाबाबत उपकरणे बसविण्यासाठी दुर्लक्ष केले जात असून मोठ्या प्रमाणात कारखान्यांचे वायू प्रदूषण सुरूच आहे.
◾ काय उपाययोजना करणे अपेक्षित
महाराष्ट्र प्रदूषण नियंत्रण कार्यालयावर असलेले प्रदूषणमापक यंत्र अनेक वर्षांपासून बंद असून याकडे प्रदूषण नियंत्रण मंडळाचे दुर्लक्ष झालेले आहे. औद्योगिक क्षेत्रातील काही रासायनिक कारखान्यांमध्ये रात्रीच्या वेळी उत्पादने घेतली जातात. याचवेळी घातक अशा प्रक्रिया केल्या जात असल्याने त्यातून निघणारे विषारी वायू रात्रीच्या वेळी हवेमध्ये सोडले जातात. कारखान्यातून सोडला जाणारा विषारी वायू याबाबत प्रदूषणमापक यंत्र रासायनिक प्रदूषण असलेल्या भागात बसवणे अपेक्षित आहे. यामुळे कोणत्याही भागात सर्वात जास्त प्रदूषण आहे याबाबत प्रदूषणाचा स्थर समजू शकतो.
