महामार्गावरील अपघातात इको कार आणि बस जळून खाक

◾ आगीत इको कार चालकाचा दुर्दैवी मृत्यू; तर एकाचा उपचारादरम्यान मृत्यू

पालघर दर्पण: वार्ताहर

मनोर: मुंबई अहमदाबाद महामार्गावरील ढेकाळे उड्डाणपुलावर 13 आँगस्ट गुरुवारी दुपारी दोन वाजताच्या सुमारास इको कार आणि एसटी बसचा अपघात झाला. अपघातग्रस्त इको कारने पेट घेतल्याने कार आणि एसटी बस जळून खाक झाली. अपघातात इको कार चालक अडकून पडल्याने त्याचा दुर्दैवी मृत्यू झाला. तर इको कार मधील एक प्रवाशी गंभीर जखमी झाला होता,त्याला उपचारासाठी मनोरच्या ग्रामीण रुग्णालयात दाखल करण्यात आले असता उपचारादरम्यान त्याचा दुर्दैवी मृत्यू झाला आहे. यातच बस चालक देखील किरकोळ जखमी झाला आहे.

गुरुवारी दुपारी दोन वाजताच्या सुमारास बोईसर एसटी देपोमधील एसटी बस (MH14BT2649)बोरिवली हुन बोईसर बाजूला जात होती. एसटी बसच्या चालकाचे महामार्गावरील ढेकाळे उड्डाणपुलावर नियंत्रण सुटल्याने एसटी दुभाजक ओलांडून मुंबई वाहिनीवरील इको कारला(MH04HX7528) धडकली. या अपघातात इको कार ने पेट घेतल्याने इको कार आणि एसटी बस जळून खाक झाली. अपघातात इको चालक ड्रायव्हर केबिन मध्ये अडकून पडल्याने त्याचा जळून मृत्यू झाला. इको कार मधील एक प्रवाशी गंभीर जखमी झाला होता,त्याला स्थानिकांनी अपघातग्रस्त कार मधून बाहेर काढून मनोरच्या ग्रामीण रुग्णालयात दाखल करण्यात आले होते मात्र त्याचा उपचारादरम्यान मृत्यू झाला. एसटी बसच्या चालक निलेश भांगरे (35) किरकोळ जखमी झाले आहेत. एसटी बस मध्ये तीन प्रवाशी प्रवास करीत असल्याची माहिती वाहक चंद्रकांत डोंणगे यांनी दिली.