- औद्योगिक क्षेत्रातील बजाज हेल्थ केअरने हस्तांतरित केलेल्या कारखान्यातुन घातक रसायन वाहतूक करणारा ट्रक पोलिसांच्या ताब्यात; पालघर कंट्रोल रूमला तक्रार दाखल केल्यानंतर मनोर पोलिसांनी केली कारवाई
पालघर दर्पण: प्रतिनिधी
बोईसर: तारापुर औद्योगिक क्षेत्रातील आठ दिवसापूर्वी बंद करण्यात आलेल्या रासायनिक कारखान्यातुन घातक रसायन वाहतूक करणाऱ्या ट्रक ला मनोर पोलिसांनी मंगळवारी सायंकाळी ताब्यात घेतले आहे. औद्योगिक क्षेत्रातुन घातक रसायन घेवुन जात असल्याची माहिती पोलिसांना देण्यात आली होती. त्यानुसार ही कारवाई करण्यात आली असुन बेकायदेशीर पणे घातक रसायन वाहतुकीचा प्रकार पुन्हा एकदा समोर आला असून अशा प्रदुषणकारी कारखान्यांवर फौजदारी कारवाई करण्याची मागणी करण्यात आली आहे.
औद्योगिक क्षेत्रातील प्लाँट नंबर टी- 30 या न्युट्रा प्लस व आता बजाज हेल्थ केअर कारखान्यांने हस्तांतरित केलेल्या कारखान्यातुन घातक रसायन विल्हेवाट लावण्यासाठी घेवुन जाणार असल्याची माहिती समोर आली होती. त्यानुसार महाराष्ट्र प्रदुषण नियंत्रण मंडळाचे उपप्रादेशिक अधिकारी यांना वाहना बाबत माहिती दिली असता त्यांनी त्याकडे प्रथमदर्शनी दुर्लक्ष केल्याचे दिसून आले होते. परंतु प्रकरण अधिकच गंभीर असल्याने पालघर पोलीस अधीक्षक यांना संपर्क साधुन बेकायदेशीर पणे घातक रसायन घेवुन चाललेल्या वाहनांवर कारवाई करण्याबाबत तक्रार देण्यात आली होती. मात्र केमिकल घेवुन जाणारे वाहन बोईसर बेटेगाव चौकी वरून पुढे गेले असताना देखील बेटेगाव येथील तपासणी नाक्यावर साधे वाहन तपासणी साठी देखील थांबविण्यात आले नाही.
घातक रसायन घेवुन जाणाऱ्या ट्रक ची माहिती मंगळवारी सायंकाळी पालघर कंट्रोल रूमला दिल्यानंतर मनोर पोलिसांनी रसायन ड्रम भरलेले वाहन चिल्लार फाटा येथे ताब्यात घेतले. यानंतर रसायन भरलेला ट्रक मनोर पोलीस ठाण्यात आणण्यात आला असुन महाराष्ट्र प्रदुषण नियंत्रण मंडळाचे अधिकारी देखील पंचनामा करण्यासाठी त्याठिकाणी दाखल झाले. औद्योगिक क्षेत्रातुन टी-30 या कारखान्यातुन निघालेला ट्रक MH 04, JU 4919 या वाहन चालका कडे जी. आर एन्टरप्रायजेस अवधनगर बोईसर येथून रसायन ड्रम घेतल्याचे बनावट बिल असल्याचे उघड झाले आहे. यातच या ट्रक मध्ये सुमारे 33 ते 35 हे 200 लिटरचे ड्रम असल्याचे दिसून आले आहे. यामुळे घातक रसायन प्रकरणी नोटीस बजावलेल्या कारखान्यांवर फौजदारी कारवाई करण्याची मागणी जोरधरू लागली आहे.
◾ तारापुर औद्योगिक क्षेत्रातील प्लाँट नं. टी- 30 हा कारखाना बजाज हेल्थ केअर या उद्योगाने हस्तांतरित केला आहे. कारखान्याला आठ दिवसापूर्वी महाराष्ट्र प्रदुषण नियंत्रण मंडळाने उत्पादन बंद करण्याचे आदेश देत कारखाना बंद केला होता. याठिकाणी 120 ड्रम घातक रसायन बेकायदेशीर पणे भरून ठेवले असल्याचे बजावलेल्या नोटीसीत म्हटले होते. महाराष्ट्र प्रदुषण नियंत्रण मंडळाच्या कारवाईतुन वाचण्यासाठी बेकायदेशीर पणे घातक रसायन ची वाहतूक केली जात होती. मात्र पोलिसांनी केलेल्या कारवाई मध्ये कारखान्याचा हा प्रकार समोर आला आहे. यातच याअगोदर देखील अशा प्रकारे घातक रसायन वाहतूक केली असल्याची शक्यता नाकारता येत नाही.
