◾ बेकायदेशीर पणे रासायनिक सांडपाणी सोडल्या प्रकरणी महाराष्ट्र औद्योगिक विकास महामंडळाची बजाज कारखान्याला नोटीस; प्रदुषण नियंत्रण मंडळ मात्र कारवाई करण्यासाठी उदासीन
पालघर दर्पण: विषेश प्रतिनिधी
बोईसर: तारापुर मधील प्रदुषणकारी कारखान्यांवर महाराष्ट्र प्रदुषण नियंत्रण मेहरबान असल्याचे दिसून येत असुन प्रदुषणकारी बजाज हेल्थ केअर कारखान्यावर कोणत्याही प्रकारची कारवाई केलेली नाही. मात्र रासायनिक सांडपाणी खुलेआम नैसर्गिक नाल्यामध्ये सोडलं जात असल्याची बातमी पालघर दर्पण ने प्रसारित केलेल्या बातमी नंतर याची दखल घेत महाराष्ट्र औद्योगिक विकास महामंडळाने या कारखान्याला नोटीस बजावली आहे. परंतु प्रदुषण नियंत्रण मंडळाने केलेले दुर्लक्षा मुळे अनेक सवाल उपस्थित होत आहेत.
तारापुर औद्योगिक क्षेत्रातील प्लाँट नं- इ 62/63 या बजाज हेल्थ केअर लि. कारखान्यातुन बाहेर असलेल्या नाल्यात व औद्योगिक क्षेत्राचे सांडपाणी वाहून नेणाऱ्या वाहिनीत रात्रीच्या वेळी घातक रसायन सोडले जात असल्याचे पालघर दर्पणने उघडकीस आणले होते. याबाबत बातमी प्रसिद्ध झाल्यानंतर महाराष्ट्र औद्योगिक विकास महामंडळाने बजाज हेल्थ केअर कारखान्याला नोटीस बजावुन तिन दिवसात उत्तर सादर करण्याचे आदेश दिले आहेत. असे असले तरी प्रदुषणाची जबाबदारी असलेल्या महाराष्ट्र प्रदुषण नियंत्रण मंडळाने मात्र तक्रारी करून देखील या कारखान्या विरोधात कोणत्याही प्रकारची कारवाई आजवर केलेली नाही. दिवसेंदिवस तारापुर मधील प्रदुषण वाढत असताना देखील अशा प्रदुषणकारी कारखान्याला दिली जाणारी मोकळीक चिंताजनक असून प्रदुषणकारी कारखान्यांवर कारवाई करण्याची मागणी केली जात आहे.
◾ बजाज हेल्थ केअर कारखान्यातुन रात्रीच्या वेळी कोणी नसल्याचे पाहुन मोठ्या प्रमाणात रसायन नाल्यात सोडुन दिल्याचे दिसुन आले आहे. याबाबत एक विडीओ समोर आला असुन प्रदुषण करणाऱ्या बजाज हेल्थ केअर कारखान्यांचा पर्दाफाश झाला आहे. परंतु सर्व प्रकारचे पुरावे समोर आले असताना देखील तसेच महाराष्ट्र प्रदुषण नियंत्रण मंडळाचे प्रादेशिक अधिकारी यांच्या कडे तक्रार दाखल करण्यात आली असताना ही कारवाई कडे कोणाच्या दबावाखाली येवुन दुर्लक्ष केले जाते हा संशोधनाचा विषय आहे.
◾ खोटी कागदपत्रे दाखवुन वाहतूक प्रकरणी देखील दुर्लक्ष
तारापुर औद्योगिक क्षेत्रातील प्लाँट नंबर एल-11 ही पुर्वी न्यूट्रॉप्लस व आताची बजाज हेल्थ केअर च्या नावे असलेल्या कारखान्यातुन बुधवारी सायंकाळी 6 वाजताच्या सुमारास एम एच 43/ वाय 5600 या वाहनातुन कारखान्यातील साठवणूक करून ठेवलेला रासायनिक घनकचरा बाहेर काढण्यात आला होता. त्यानंतर एमएच 04/इएल 9268 या वाहनातुन देखील घनकचरा भरून बाहेर काढण्यात आले. बोईसर पोलिसांना याबाबत माहिती मिळताच त्यांनी बेटेगाव चौकीवर वाहन चौकशी साठी थांबविण्यात आले. कारखानदाराने खोटी कागदपत्रे सादर केल्यानंतर थांबवलेली मालवाहू वाहणे बोईसर पोलिसांनी सोडून दिली होती.
औद्योगिक क्षेत्रातील याअगोदर बंद असलेल्या प्लाँट नं एल 11 या कारखान्यात मोठ्या प्रमाणात रासायनिक घनकचरा साठवून करून ठेवला होता. कारखानदारांने आपल्या इतर कारखान्यांची कागदपत्रे दाखवुन चोरट्या पध्दतीने कारखान्यातील रासायनिक घनकचरा मुंबई वेस्ट मँनेजमेंट च्या वाहनातुन बाहेर काढण्यात आला. महत्त्वाचे म्हणजे ज्यावेळी पोलिसांनी वाहन पकडले त्यावेळी न्यूट्रॉप्लस कारखान्याच्या प्लाँट नं टी- 30 व एन- 92 असा उल्लेख असलेली कागदपत्रे त्याच्या कडे उपलब्ध होती. मात्र रासायनिक घनकचरा हा प्लाँट नं एल 11 मधुन भरण्यात आला होता. याबाबत महाराष्ट्र प्रदुषण नियंत्रण मंडळाचे प्रादेशिक अधिकारी यांनी दोन चौकशी अहवाल सादर करण्याचे आदेश दिले आहेत असे सांगितले होते मात्र आठवडा उलटून गेला असताना देखील कोणत्याही प्रकारची कारवाई करण्यात आली नाही.