◾️ अमली पदार्थ माफियाला बोईसर पोलिसांनी केली अटक; अमली पदार्थ बाबत सातत्याने पालघर दर्पणने सुरू ठेवला होता पाठपुरावा
पालघर दर्पण: हेमेंद्र पाटील
बोईसर: शहरातील अमली पदार्थ माफियाला अखेर बोईसर पोलिसांनी रेल्वे स्थानक परिसरातून गुरूवारी दुपारी ताब्यात घेतले आहे. गेल्या अनेक महिन्यापासून या अमली पदार्थ माफिया विरोधात अनेक तक्रारी असताना देखील पोलिसांनी त्याकडे दुर्लक्ष केले होते. याबाबत सातत्याने पाठपुरावा देखील पालघर दर्पणने केला होता. यातच काही दिवसांपूर्वी पत्रकारांंनी दिलेल्या माहितीनुसार पोलिसांनी गांजा माफियाला ताब्यात घेवुन मोठा गांजा साठा ताब्यात घेतला होता याच प्रकरणात मुख्य सुत्रधाराला अखेर ताब्यात घेण्यात आले आहे.
नागरिकांनी तक्रार करून देखील गेल्या अनेक महिन्यापासून अमली पदार्थ माफिया निलेश सुर्वे हा खुलेपणाने आपला गोरखधंदा चालत होता. बोईसर पोलिस ठाण्याचे काही पोलिस देखील या माफियाला पाठीशी घालत असल्याचे दिसून आले होते. याबाबत प्रसारमाध्यमात देखील अनेक बातम्या प्रसिद्ध करून त्याचा पाठपुरावा केला जात होता. बोईसर पोलिसांना उशिरा का होईना आपल्या कर्तव्याची जाण आल्याने अमली पदार्थ माफियांच्या मुस्क्या पोलिसांनी आवळल्या आहेत. गुरूवारी 14 एफ्रिल 2022 रोजी दुपारच्या सुमारास बोईसर रेल्वे स्थानक परिसरात ही कारवाई करण्यात आली आहे. संपूर्ण बोईसर भागात अमली पदार्थ विक्री करणारा मुख्य सुत्रधाराला ताब्यात घेतल्याने त्याच्या संपर्कात असलेले राजकीय पुढारी व अमली पदार्थ रँकेट चालवणारे माफियांचा शोध पोलिसांना आता घेता येणार आहे.
स्थानिक पत्रकारांनी पोलिस कंट्रोल रूमला दिलेल्या माहितीनुसार 7 एफ्रिल रोजी बोईसर पोलिसांनी साधारण 3 किलो गांजा ताब्यात घेतला होता. याच वेळी ताब्यात घेतलेल्या आरोपी सोबत निलेश सुर्वे याचा वारंवार मोबाईल वरून संपर्क असल्याचे पोलीस तपासणी मध्ये दिसून आले होते. तपास अधिकारी पोलीस उपनिरीक्षक योगेश खोंडे व त्यांची टीम मुख्य सुत्रधाराला असलेल्या निलेश सुर्वे चा मागोवा घेत होती. यातच चार दिवसापासून बोईसर पोलिस आपल्याला ताब्यात घेतील या भितीने निलेश सुर्वे आपले सर्व दुरध्वनी बंद भुमीगत झाला होता. यातच याचे काही सहकारी गुरुवारी रात्री अमली पदार्थ विक्री करणाऱ्या अड्ड्यावर असताना पत्रकारांंनी याबाबत कंट्रोल रूमला माहिती दिल्यानंतर याठिकाणी पोलीस आल्यानंतर माया व अन्या नावाचे सुर्वेचे साथीदार याठिकाणाहुन पळून जाण्यात यशस्वी झाले होते. घटनास्थळी असलेली एक दुचाकी देखील पोलीस ताब्यात घेतली होती. यातच गुरूवारी सकाळी पासुनच पोलिस उपनिरीक्षक योगेश खोंडे व त्यांची टीम निलेश सुर्वे याचा शोध घेत असताना बोईसर रेल्वे स्थानक परिसरातून दुपारी त्याला ताब्यात घेण्यात आले आहे.
◾️ निलेश सुर्वे या आरोपीला ताब्यात घेतले असुन अमली पदार्थ बाबत सर्व तपास सुरू आहे. याप्रकरणात जे दोषी असतील त्यांच्या वर कायदेशीर कारवाई केली जाईल.
— सुरेश कदम, पोलिस निरीक्षक बोईसर
