◾ चार कारखाने एकाच दिवशी बंद करण्याचे आदेश तर बड्या उद्योजकांच्या कारखान्यावर कारवाई करण्याचा प्रस्ताव असताना देखील निर्णय नाही
पालघर दर्पण: विशेष प्रतिनिधी
बोईसर: तारापूर औद्योगिक क्षेत्रातील रासायनिक कारखान्यांवर महाराष्ट्र प्रदूषण नियंत्रण सोईनुसार कारवाई करत असल्याचे दिसून आले आहे. प्रदूषण नियंत्रण मंडळाची लघू उद्योजकांवर कारवाई करण्यासाठी एकीकडे तत्परता दाखवत असताना इतर मोठ्या उद्योगांवर कारवाई करण्यास सोयीस्कररीत्या दिरंगाई करण्यात येत असल्याचे उघडकीस आले आहे. यामुळे लहान उद्योजकांवर तुटपुंज्या उपाययोजना नसल्याने कारवाई केली जात असली तरी लाखो लिटर घातक रसायन सोडताना आढळून आलेल्या कारखान्यांवर मेहबानी का असा सवाल उपस्थित केला जात आहे.
तारापूर औद्योगिक क्षेत्रात रासायनिक प्रदूषणाचा विषय रोजच समोर येत असून याठिकाणी होणाऱ्या रासायनिक प्रदूषणामुळे येथे जनजीवन धोक्यात आले आहे. रात्रीच्या वेळी घातक रसायन सोडणे, विषारी वायू सोडणे व घनकचऱ्यांची बेकायदेशीर पणे विल्हेवाट लावणे यामुळे येथील सभोवतालचा परिसर पुर्ण पणे प्रदूषित झाला आहे. औद्योगिक क्षेत्रातील काही उद्योगांना प्रदूषण नियंत्रण मंडळाच्या अधिकाऱ्यांनी पाहणी केल्यानंतर अवघ्या दोन दिवसात कारवाईचा बडगा उभारला तर काही मोठ्या उद्योगाला कारवाईसाठी शिफारस केल्यानंतर महिना सव्वा महिना उलटला तरी कोणतीही कारवाई झाली नसल्याचे दिसून आले आहे. प्रदूषण नियंत्रण मंडळाच्या अधिकाऱ्यांच्या या दुटप्पी भूमिकेमुळे तारापूर येथील लघुउद्योजक भरडला जात असून परिणामी येथील उद्योगांना इतर राज्यांमध्ये स्थलांतरित करण्याचा विचार सुरू झाला आहे.
तारापूर मधील काही मोठ्या उद्योगांचे राजकीय पुढाऱ्यांची जवळीक असल्याने त्यांच्यावर कारवाई करण्यास प्रदूषण नियंत्रण मंडळ चालढकल करत असल्याचे तारापूर मधून एकंदर कारवाई सत्राचा अभ्यास केल्यानंतर दिसून येते. तर प्रदूषण करणाऱ्या सर्व उद्योगांना एकाच पद्धतीने कारवाई करायची व कारवाई करण्यापूर्वी नियमावलीमध्ये सुसूत्रता आणण्याची मागणी येथील कारखानदारांन कडून करण्यात येत आहे. तारापूर मधील प्रदूषणाचा ठपका ठेवून चार उद्योजकांवर एकाच दिवशी कारवाई करण्यात आली. यामध्ये श्रेयाना केमिकल डब्ल्यु- ४३,शेया केमिकल टी-१३/१४, ओशिनिक लॅबरोटरीज प्रा.लि एल -९१,मोल्टस रीसर्च लॅबरोटरीज एन – ५९,एनजीएल फाईन केम.ली.डब्ल्यु-४१, कॅम्लीन फाईन केमिकल ली. डी.२/३,नोवाफेन स्पेशलीटीज प्रा.ली.एन -२७ या कारखान्यांचे कंपन्यांना उत्पादन बंद च्या नोटीस दिल्या असून या खेरीज आणखीन 16 कंपन्यांचे उत्पादन बंद झाले. यातील चार कारखान्यांला उत्पादन बंदची नोटीस एक दिवसात देण्यात आले आहे.
◾औद्योगिक क्षेत्रातील आरती सहमुहातील प्रदूषणकारी कारखाने व त्या कारखान्यातील रासायनिक सांडपाणी सत्तरबंगला भागातील एस ४७ याठिकाणी विल्हेवाट लावण्यासाठी आणले जात असल्याचे उघड झाले असताना देखील प्रादेशिक अधिकारी राजेंद्र राजपूत यांनी वरिष्ठ अधिकारी यांच्या कडे अहवाल पाठविला असल्याचे नाट्य गेल्या महिन्याभरापासून लावून धरले आहे. यामुळे अशा अधिकाऱ्यांना राष्ट्रीय हरित लवादाच्या कारवाईचे अभय असल्याचे दिसून येते.
◾प्रदूषणकारी कारखान्यांवर आम्ही कारवाई करत आहोत. यातील काही उद्योजकांवर कारवाई बाबत अहवाल वरिष्ठ कार्यालयात पाठवला आहे. त्यांनी होकार दिल्यानंतर तातडीने कारवाई करू. कोणत्याही उद्योजकाला मोकळीक दिली जात नाही.
— राजेंद्र राजपूत, प्रादेशिक अधिकारी ठाणे, महाराष्ट्र प्रदूषण नियंत्रण मंडळ
