■ देशाच्या सरकारने शांत राहणे आणि देशातीलस समस्या मात्र बाहेर गेली हे योग्य नाही; शरद पवार
पालघर दर्पण : प्रतिनिधी
कृषी कायदे रद्द करण्यासाठी दिल्लीच्या सीमेवर शेतकऱ्यांचे आंदोलन सुरू आहे. जवळपास ११ बैठकी होऊन देखीलही अद्याप तोडगा निघाला नसल्याने आता शेतकऱ्यांचे आक्रमक रूप पहायला मिळत आहे. शेतकरी व पोलीस यांच्यातील हिंसाचारामुळे शेतकऱ्यांवर गुन्हे दाखल झाले आहेत. एकीकडे काही जण सरकारचे समर्थम करीत आहेत तर दुसरीकडे तोडगा न निघाल्याने हॉलिवूड व बॉलिवूडचे काही सेलिब्रेटी शेतकऱ्यांचे समर्थन करीत आहेत. यातच आता राष्ट्रवादी काँग्रेसचे अध्यक्ष शरद पवार यांनी देखील आपले मत मांडले आहे.
आतापर्यंत शांत असलेले शेतकरी जर हिंसक झाले तर सर्व जबाबदारी भाजप सरकारची असेल. दिल्लीत मागील दोन महिन्यांपेक्षा जास्त काळापासून सुरु असलेल्या शेतकऱ्यांच्या आंदोलनावर अद्यापही तोडगा निघालेला नाही. दिल्लीत झालेल्या पत्रकार परिषदेत शेतकरी आंदोलन इंधनदरवाढीच्या मुद्द्यावरुन मोदी सरकारवर टीका केली. पंतप्रधान शेतकऱ्यांना भेटायला जाऊ शकत नाही ही खेदाची बाब
आज ज्यांच्या हातात देशाची सत्ता आहे त्यांना नागरिकांच्या समस्यांशी काही घेणं देणं नाही. दिल्लीच्या सीमेवर शेतकरी अनेक दिवसांपासून आंदोलन करत आहेत. देशाचे पंतप्रधान २० ते ३० किमी अंतरावर असलेल्या शेतकऱ्यांना भेटायला जाऊ शकत नाही हे खेदाची बाब आहे. आज जे शांततेत आंदोलन आहे ते जर वाढलं तर त्याला वेगळं वळण लागेल आणि यासाठी जबाबदार भाजप सरकार असेल. हे सरकार संवेदनशील नाही. विरोधी पक्षातील नेते आज आंदोलक शेतकऱ्यांची भेट घ्यायला जाणार होते मात्र त्यांना भेटू दिलं गेलं नाही.
शेतकऱ्यांना जे अडथळे निर्माण केले आहेत हे आजवर कधी झालं नाही. आज शेतकऱ्यांना जी वागणूक मिळत आहे त्यामुळे देशासमोर एक संकट उभं राहणार आहे. लोकशाहीसाठी हे धोकादायक आहे. संसदेत काही झालं नाही. शेतकऱ्यांच्या प्रश्नांवर चर्चा केली नाही. जर चर्चा झाली असती तर आंदोलन इतकं वाढलं नसतं, असं शरद पवार यावेळी म्हणाले. शेतकऱ्यांची समस्या आंतरराष्ट्रीय बनली आहे. त्यावर बाहेरचं कुणी बोलावं याचं समर्थन नाही. मात्र देशाच्या सरकारने शांत राहणे आणि इथली समस्या बाहेर गेली हे योग्य नाही.
