पालघर दर्पण: प्रतिनिधी
पालघर: बोईसर कल्लाळे मान येथील मूळ रहिवासी असणाऱ्या 20 वर्षीय तरुणीची नाशिक येथे गूढ रित्या हत्या झाल्याची घटना पुढे आली आहे. याप्रकरणी नाशिक पोलिसांनी संशयित प्रियकराला ताब्यात घेतले आहे.
नाशिक येथे वैद्यकीय शिक्षण घेणाऱ्या अर्चना सुरेश भोईर ही नासिक सीबीएस जवळील एका हॉटेल लॉजिंग मध्ये मृतावस्थेत सापडल्याचे आढळून आले. मंगळवारी रात्री होस्टेल मधून बेपत्ता झालेल्या या तरुणीचा संपर्क होत नसल्याने तिच्या पालकांनी पोलिसांची संपर्क साधला. पोलीस व मुलीचे नातेवाईक त्या हॉटेलमध्ये पोहोचल्यानंतर मृतावस्थेत असलेल्या तरुणीसोबत पालघर तालुक्यातील मासवण कोळीपाडा येथील एक २१ वर्षीय तरुण सोबत होता, त्याला पोलिसांनी ताब्यात घेतला आहे. या युवतीचे तोंड दाबून खून केल्याचा संशय व्यक्त होत असून हे युगल हॉटेल मध्ये मुक्कामी आले असल्याची माहिती पुढे येत आहे.
शवविच्छेदन केल्यानंतर मुलीचा मृतदेह मान या मूळगावी अंत्यविधीसाठी आणण्यात आला तर सोबतच्या तरुणाला नाशिक पोलिसांनी ताब्यात घेतले आहे.
