पालघर दर्पण: वार्ताहर
नालासोपारा: वसई विरार शहरात दिवसेंदिवस चोरीच्या घटना वाढत असताना तुळींज पोलिसांकडून दोन सराईत सोनसाखळी चोरांना अटक करण्यात आली आहे. चौकशीत दोन्ही आरोपींकडून सहा गुन्ह्याची उकल करण्यात आली असून लाखो रुपयांचा मुद्देमाल हस्तगत करण्यात आला आहे.
तुळींज पोलीस ठाणे हद्दीत सोनसाखळी खेचणे,मोबाईल चोरने, पोलीस असल्याची बतावणी करून लुटणे या प्रकारांमध्ये वाढ होत आहे या घटनांना आला घालण्यासाठी वरीष्ठ पोलीस निरीक्षक जयकुमार सूर्यवंशी यांच्या मार्गदर्शनाखाली गुन्हे प्रकटीकरण शाखेच्या पोलीस अधिकारी व कर्मचारी यांनी आधी गुन्ह्यात सहभागी व संशयित असलेल्या आरोपींचा शोध सुरू केला यात आरोपी मनवर मेहबूब शेख (१९) आणि अमजत बफाशीर खान (२१) यांना १५ तारखेला अटक करण्यात आली आहे .
चौकशीत यांच्याकडून सहा गुन्ह्यांची उकल करण्यात आली असून २ लाख २४ हजार रुपये किंमतीचे दागिने ,मोबाईल, गुन्ह्यात वापरण्यात आलेल्या १ लाख १० हजार रुपये किंमतीच्या दुचाकी असा एकूण ३ लाख ३४ हजार रुपये किंमतीचा मुद्देमाल जप्त करण्यात आला आहे. न्यायालयातून आरोपींना सहा दिवसांची पोलीस कोठडी सुनावण्यात आली आहे.
