◾शिवसेना नेते आणि आमदारांनी घेतली पोलीस अधीक्षकांची भेट; एकनाथ शिंदे यांच्यावर जादूटोणा करणारा मुख्य सुत्रधार मोकाट
पालघर दर्पण: विशेष प्रतिनिधी
पालघर: महाराष्ट्र राज्याचे मंत्री एकनाथ शिंदे यांच्या जीवास धोका होण्यासाठी अघोरी प्रथेचा वापर करण्यात आल्याचे समोर आले होते. जव्हार पोलीस स्टेशन हद्दीतील कऱ्हे तलावली याभागात एका घरात जादूटोणा करताना स्थानिक गुन्हे शाखने कारवाई केली होती. जादूटोणा प्रकरणी पालघर जिल्ह्यातील शिवसेनेच्या पदाधिकाऱ्यांनी पालघर जिल्हा पोलीस अधिक्षकांची भेट घेतली असूूून मुख्य सूत्रधाराला अटक करण्याची मागणी यावेळी शिवसेनेकडून करण्यात आली आहे.
जव्हार पोलीस स्टेशन हद्दीतील कऱ्हे तलावली येथील एका घरात तांदळामध्ये ठाणे जिल्ह्याचे पालकमंत्री एकनाथ शिंदे यांचा फोटो ठेवून अलौकिक शक्तीची कृपा मिळविण्याचे हेतूने शिंदे यांच्या जीवाला धोका व्हावा अथवा त्यांच्या शरीराला जीवघेण्या जखमा होवून दुखापत करण्याकरिता अनिष्ठ अघोरी प्रथांचा वापर करण्यात आल्याचा धक्कादायक प्रकार समोर आला होता. एकनाथ शिंदे यांच्या फोटो समोर अगरबत्ती पेटवून हळद, कुंकू, काळा बुक्का, लिंबू , सफेद कोंबडा यांचा वापर करून अघोरी जादूटोणा करण्यात प्रकार करण्यात आला. याप्रकरणी पालघर उप विभागीय पोलीस अधिकारी विकास नाईक यांच्या मार्गदर्शनाखाली बोईसर स्थानिक गुन्हा शाखेच्या पथकाने विक्रमगड तालुक्यातील व जव्हार पोलीस स्टेशन हद्दीतील कऱ्हे तलावली येथून अटक केली आहे. अटक केलेली इसम हे अशा अघोरी जादूटोणा करून लोकांना फसवत असून त्यांच्याकडून पैसेही उकळत असल्याचे सांगितले जात आहे.
महाराष्ट्र राज्यातील अघोरी जादूटोणा नरबळी वाढते प्रमाण लक्षात घेऊन शासनाने महाराष्ट्र नरबळी आणि अमानुष अनिष्ठ व अघोरी प्रथा व जादूटोणा यांना प्रतिबंध घालण्यासाठी व समुळ उच्चाटन करण्यासाठी अधिनियम २०१३ अमलात आणला असला तरी या प्रथा अजूनही सुरूच आहेत. एकनाथ शिंदे यांचा फोटो लावून यापूर्वी देखील अशीच अघोरी प्रथा करत असल्या बाबतचा एक जुना विडीओ सोशल मीडियावर व्हायरल झाला आहे.यामध्ये एक वयस्कर इसम फोटोसमोर जादूटोणा आणि अघोरी प्रथा सुरू असल्याचे व्हिडीओ मध्ये दिसते.
अटक केलेले कृष्णा बाळू कुरकुटे व संतोष मगरू वारडी यांच्यावर जव्हार पोलीस स्टेशन मध्ये फसवणूक व महाराष्ट्र नरबळी, अमानुष अनिष्ठ अघोरी प्रथा, जादूटोणा प्रतिबंध गुन्हा नोंद करण्यात आला आहे. मात्र मुख्य सूत्रधार मोकाट असल्याने त्यांचा शोध घेण्याची मागणी शिवसेनेच्या शिष्टमंडळाने पोलीस अधीक्षकांकडे केली आहे. यावेळी शिवसेनेचे आमदार श्रीनिवास वनगा,शिवसेना पालघर जिल्हाप्रमुख राजेश शहा, वसंत चव्हाण, युवासेना आणि महिला आघाडीच्या पदाधिकाऱ्यांसह मोठ्या संखेत कार्यकर्ते उपस्थित होते.
