◾ मुंबई अहमदाबाद राष्ट्रीय महामार्गावर कार जळून खाक; कार चालक आणि त्याचे दोन मित्र सुखरूप
पालघर दर्पण: वार्ताहर
मनोर: मुंबई अहमदाबाद महामार्गावर बोट गावच्या हद्दीतील उड्डाणपुलाजवळ गुरुवारी (ता.17)सायंकाळी धावत्या कारने पेट घेतला. प्रसंगावधान राखत चालक आणि त्यांचे सहप्रवासी बाहेर पडल्याने जीवितहानी झाली नाही. दरम्यान काही काळ महामार्गावरील वाहतूक प्रभावित झाली होती.
मुंबई अहमदाबाद महामार्गावर गुरुवारी सायंकाळी चार वाजताच्या सुमारास मुंबईच्या दिशेने जात असलेल्या MH05AJ9624 क्रमांकाच्या ह्युंदाई आय टेन कारमधूम फिरोज सोळंकी आणि त्यांचे दोन मित्र मुंबईच्या दिशेने जात होते. कार बोट गावच्या हद्दीतील उड्डाणपुलाजवळ पोहोचली असता चालत्या कार मधून अचानक धूर निघू लागला आणि कारने पेट घेतला. प्रसंगावधान राखून चालक आणि त्यांचे दोन मित्र कारच्या बाहेर पडले.परंतु कार जळून खाक झाली. जळालेल्या कार चे अवशेष महामार्गावरून हटवून वाहतूक सुरळीत करण्यात आल्याची माहिती महामार्ग वाहतूक पोलीस उपनिरीक्षक प्रकाश दिंडे यांनी दिली.
