पालघर दर्पण: वार्ताहर
वाडा: तालुका मुख्यालयी ठिकाणी असलेल्या तहसील कार्यालयाची इमारत, पोलीस ठाण्याची इमारत या प्रमुख कार्यालयीन इमारतींना दरवर्षी पावसाळ्यात गळती लागते. ही गळती थांबविण्यासाठी प्लास्टिकचा आधार द्यावा लागत आहे. या वर्षीसुद्धा या दोन्ही कार्यालयाच्या संपुर्ण इमारती प्लास्टीकने आच्छादून घेतल्या आहेत.
तालुक्याच्या ठिकाणी असलेल्या सर्वच शासकीय इमारतींची दुरावस्था झालेली दिसुन येते. दरवर्षी इमारत दुरुस्तीवर लाखो रुपये खर्च केला जात असतानाही येथील इमारत गळतीचे प्रमाण जैसे थे दिसुन येत आहे.
वाडा तहसीलदार व पोलीस ठाणे या दोन्ही कार्यालयाच्या इमारती ह्या ब्रिटिश कालावधीत (1903) दगडी बांधकाम केलेल्या आहेत. कौलारू छप्पर असलेल्या या इमारतींची कौले गेली अनेक वर्षे बदलली गेली नसल्याने या कौलांमधून पाणी झिरपून महत्त्वाचा दस्तऐवज भिजून खराब होत असतो. पावसाच्या पाण्याची गळती थांबविण्यासाठी दरवर्षी हजारो रुपये खर्च करून या इमारतींना प्लास्टिकचा आधार दिला जातो. या वर्षीसुद्धा या दोन्ही इमारती प्लास्टिकने आच्छादून घेतल्या असुन गळती थांबविण्याचा प्रयत्न केला आहे.
येथील विज वितरण कंपनीच्या उप विभागीय कार्यालयालाच्या इमारतीची गळतीमुळे खुपच दुरावस्था झाली आहे. ही कार्यालयीन इमारत गेली पन्नास वर्षांपासून भाड्यानी घेतलेली आहे. या इमारतीबाबत इमारत मालक व विज वितरण कंपनीचा वाद न्यायालयात सुरु असल्याने गेली अनेक वर्षे या इमारतीची दुरुस्ती करण्यात आलेली नाही. यामुळे पावसाळ्यात या इमारतीमध्ये होत असलेल्या गळतीमुळे येथील विद्युत उपकरणे व महत्त्वाचा दस्तऐवज भिजून खराब होत आहे.