◾मारहाणीत तरुण गंभीर जखमी; मनोर मध्ये भंगार माफियां मोकाट
पालघर दर्पण: वार्ताहर
पालघर: पोलीसांसोबतच्या आर्थिक संबंधांमुळे मनोर पोलीस ठाणे हद्दीत भंगार माफिया मोकाट सुटले आहेत. सोमवारी सायंकाळी मस्तान नाक्यावरील महालक्ष्मी हॉटेल समोर एका स्थानिक तरुणाला भंगार माफियांकडून बेदम मारहाण करण्यात आली आहे. भंगार माफियांच्या मारहाणीत तरुण गंभीर जखमी झाला असून त्याला उपचारासाठी सिल्वासा येथील रुग्णालयात दाखल करण्यात आले आहे.
सोमवारी सायंकाळी मस्तान नाक्यावरील महालक्ष्मी हॉटेल समोर टेन नाक्याचा रहिवासी सोहेब आवारी चहा घेत उभा होता.यावेळी वाडा मनोर रस्त्यावर भंगार दुकान चालवणारा उत्तर भारतीय भंगार माफिया समिउल्ला खान उर्फ पौर्वा याने त्याच्या सोबत वाद घालण्यास सुरुवात केली. वाद विकोपाला गेल्यानंतर पौर्वा याने त्याच्या मुलांना बोलावून घेत त्याच्या तीन मुलांसोबत सोहेब आवारी याला लोखंडी सळईच्या साहाय्याने बेदम मारहाण केली.मारहाणीत गंभीर जखमी झालेल्या सोहेब आवारी याला मनोर च्या ग्रामीण रुग्णालयात दाखल करण्यात आले होते.ग्रामीण रुग्णालयात प्रथमोपचार केल्यानंतर त्याला पुढील उपचारासाठी सिल्वासा येथील रुग्णालयात हलविण्यात आले आहे.
स्थानिक ग्रामस्थांनी मारहाणी दरम्यान मध्यस्थी करण्याचा प्रयत्न केला असता पोलीस माझे काहीच वाकडे करू शकत नसल्याचे सांगत दमदाटी केली. मनोर पोलीस ठाण्याचा नुकताच पदभार घेतलेले पोलीस निरीक्षकांच्या कार्यपद्धती बद्दल मनोर परिसरात उलटसुलट चर्चा सुरू आहेत.भंगार माफियांच्या साटेलोट्यांमुळे भंगार माफियांना कायद्याचा धाक उरलेला नाही. त्यामुळे भंगार माफियांवर कारवाई मागणी केली जात आहे.
■29 जून 2021 रोजी मुंबई अहमदाबाद महामार्गावरील मस्तान नाक्यावर सावरखंड गावचा रहिवासी रमेश बरफ आणि त्याचा मित्र विनोद गोवारी याला उत्तर भारतीय चिकन विक्रेता नोमान बेग आणि त्याच्या तीन भावांनी मिळून दोघांना बेदम मारहाण केली होती. त्यानंतर तीक्ष्ण हत्याराने रमेश च्या डोक्यावर, कानावर आणि पाठीवर वार करून गंभीर जखमी केले.यावेळी भांडण सोडविण्यासाठी पुढे आलेल्या रमीज पठाण याच्यावर ही चाकूच्या साहाय्याने वार करून त्याला जखमी होते. याप्रकरणी मनोर पोलीस ठाण्यात भा द वि स 307 नुसार गुन्हा दाखल करण्यात आला होता.
◾भंगार माफिया पौर्वा कडे कडे काम करणाऱ्या माणसांना वेगास हॉटेल लगतच्या शेत जमिनीत असलेल्या बंद कंटेनर मधील लोखंड चोरी करताना सोहेब याने पाहिले होते.चोरी केलेले लोखंड एका गांजा विक्रेत्यांला विकल्याची माहिती सोहेब आवारी याच्याकडे होती.त्यामुळेच सोहेब आवारी याना भंगार माफिया पौर्वा आणि त्याच्या मुलांनी सोहेब याला मारहाण केल्याची चर्चा ग्रामस्थांकडून केली जात आहे.
◾दरम्यान बंद कंटेनर मधील भंगार चोरीची माहिती पोलिसांना देण्यात आली आहे. मनोर पोलीस काय कारवाई करतात याकडे ग्रामस्थांचे लक्ष लागले आहे.
◾मनोर पोलीस ठाणे हद्दीत उत्तर भारतीय भंगार माफिया मोकाट सुटले आहेत. गुन्हेगारी पार्श्वभूमी असलेल्या भंगार माफियांवर तात्काळ कारवाई करावी, अन्यथा मनसे रस्त्यावर उतरेल. —- गणेश घोलप
विभाग अध्यक्ष, मनोर
