◾दादडे येथे झालेल्या भीषण अपघात 5 जण गंभीर जखमी
पालघर दर्पण: वार्ताहर
विक्रमगड: कासा – विक्रमगड या मार्गावर दादडे गावाजवळ रविवारी रात्री 10.30 च्या सुमारास भरधाव येणाऱ्या दोन ट्रकला अपघात झाला. या अपघातात रस्त्याच्या कडेला बसलेल्या काही तरुणांवर ट्रकमधील विटा कोसळून यात 4 जणांचा दुर्दैवी मृत्यू झाला असून ट्रक चालकांसह 5 जण जखमी झाले आहेत.
कासा – विक्रमगड मार्गावर भरधाव वेगात आलेल्या ट्रकने समोरून येणाऱ्या अन्य ट्रकला धडक दिल्याने एक ट्रक बाजूला कोसळून दादडे गावाजवळ भीषण अपघात झाला. ट्रक मधील सिमेंटच्या विटा लग्न कार्यातुन येऊन रस्त्याच्या बाजूला गप्पा करीत बसलेल्या 7 तरुणांवर कोसळल्या. यात जयेंद्र रावते, अनिल खरपडे, राहुल दुमाडा व सचिन खांजोडे हे चौघे मित्र ठार झाले असून अजय डावरे, संग्राम पालवा, सुरेंद्र चव्हाण, मोहम्मद इजाज अहमद यासह अन्य एक असे एकूण पाच जण जखमी झाले आहेत.
अपघात घडताच ट्रकमधील कोसळलेल्या विटा स्थानिकांनी तातडीने बाजूला करून जखमींना विक्रमगड ग्रामीण रुग्णालय, कासा रुग्णालयात तसेच जव्हार येथील रुग्णालयात उपचारासाठी दाखल केले मात्र यावेळी दोघांचा विक्रमगड तर एकाच कासा व अन्य एकाच सायन येथे मृत्यू झाल्याची माहिती पोलिसांनी दिली. उर्वरित जखमींवर विविध ठिकाणी रुग्णालयात उपचार सुरू असून यातील काहींची प्रकृती चिंताजनक आहे अशी माहिती देण्यात मिळाली आहे. दरम्यान विक्रमगड पोलीस या घटनेबाबत गुन्हा नोंदवून अधिक चौकशी करीत आहेत.
