पालघर दर्पण : विशेष प्रतिनिधी
मुंबई: काही दिवसांपूर्वी भाजपचे जेष्ठ नेते एकनाथ खडसे यांच्या राष्ट्रवादीत पक्षांतराच्या चर्चांनी जोर धरला होता. त्यानंतर शिवसेना माजी मंत्री अर्जुन खोतकर यांनी देखील खडसे यांच्या पक्षांतराच्या विषयावर चर्चा केली तेव्हा खडसे शिवसेनेत जातात की काय असा सवाल जनतेला पडला होता. मात्र आता खडसे समर्थकांनी सरळ बॅनरबाजी केल्याने पक्षांतराच्या चर्चांना अधिकच उधाण आले आहे.
खडसे यांच्या समर्थकांनी सरळ बॅनरबाजी करत “भाऊ तुम्ही बांधल तेच तोरण, तुम्ही ठरवाल तेच धोरण असे लिहिलेले बॅनर लावण्यास सुरुवात केली. त्यामुळे खडसे पक्षांतर करणार असल्याच्या चर्चांना चांगलाच जोर धरला आहे. मात्र खडसे यांनी अद्यापही या विषयावर मौन बाळगले असून कोणताही निर्णय झाल्यास स्वतः सांगू असे सांगितले. असे असले तरीही खडसे यांच्या पक्षांतरासाठी 22 तारीख चा मुहूर्त असल्याच्या चर्चा वाऱ्याच्या वेगाने पसरल्या आहेत. या सगळ्यात जनतेला मात्र खडसे कोणत्या पक्षात प्रवेश करतील याची उत्सुकता लागली आहे.
भाजपमध्ये बऱ्याच काळापासून खडसेंना डावलत असल्याचे दिसून आले. त्यामुळे खडसे यांनी बऱ्याचश्या कार्यक्रमात नाराजी व्यक्त देखील केली. त्यामुळे येत्या २२ तारखेला खडसे पक्षांतर करतील अशा चर्चा चांगल्याच रंगल्या आहेत.
